Язык:
☰ Menyu

O'zbekiston Respublikasi
Ichki ishlar vazirligi huzuridagi
Tergov departamenti

Har doim
aloqada 1102

Rasmiy ma’lumot: Navoiy viloyat IIB xodimlari tomonidan oʼtkazilgan tintuv tergov harakatidan norozi bo’lgan fuqarolarning murojaatlari bo’yicha.

Fuqarolar U.Nabiev va M.Isomovlarning xonadonlarida Navoiy viloyat IIB xodimlari tomonidan oʼtkazilgan tintuv tergov harakatlaridan noroziliklari haqida yoʼllagan murojaatlari Tergov departamenti tomonidan oʼrganib chiqildi.

Аniqlanishicha: Oʼzbekiston Respublikasi IIV huzuridagi Tergov departamenti tomonidan “Аvto 60 oy” MChJ mansabdor shaxslariga nisbatan JKning 1881-moddasi 1-qismi bilan tergov harakatlari olib borilayotgan jinoyat ishi boʼyicha 14.10.2019 yilda JPKning 347-moddasi tartibida berilgan alohida topshiriqda “jabrlanuvchilarga yetkazilgan moddiy zararni oʼrnini qoplash maqsadida jamiyatning viloyatlardagi filiallarida faoliyat yuritib kelgan shaxslar tomonidan jinoiy faoliyatdan olingan daromadlarni legallashtirish holatlari va legallashtirilgan mol-mulklarni aniqlash borasida tergov-tezkor harakatlarini tashkillashtirish, aniqlangan mol-mulklarni xatlash choralarini koʼrish” hamda filial boshliqlari (menedjer, norasmiy rahbar) va kassa mudirlarining uylarida tintuv tergov harakatini oʼtkazish koʼrsatib oʼtilgan.

“Аvto 60 oy” MChJning filiallari barcha viloyatlarda mavjud boʼlib, filiallar oʼzaro maʼlumot almashib, ishga oid hujjatlarni yoʼq qilishi mumkinligini oldini olish maqsadida, respublika boʼyicha jami 50 dan ortiq manzillarda xususan Navoiy viloyatida ham koʼplab manzillarda bir vaqtning oʼzida kechiktirib boʼlmaydigan holatda tintuv tergov harakati oʼtkazilgan.
Buning asosiy sababi jamiyatning barcha filiallari bir-biri bilan oʼzaro uzviy aloqada boʼlib turgan, agar tintuv harakatlari birin-ketin oʼtkaziladigan boʼlsa, bundan boshqa filiallar xabar topib ish uchun ahamiyatli ashyoviy dalillarni yoʼq qilishi mumkin boʼlgan.

Buni oldini olish maqsadida Navoiy viloyat IIB huzuridagi Tergov boshqarmasi boshligʼi tomonidan katta tergovchi R.Bozorov rahbarligida tergov guruhi tuzilib, guruh rahbarining 14.10.2019 yilgi kechiktirib boʼlmaydigan tintuv oʼtkazish haqidagi qaroriga muvofiq Navoiy viloyati Karmana tumani I.Karimov koʼchasi 3a-uyda joylashgan jamiyat ofisi va 2 ta xonadonda tintuv oʼtkazilgan.

Tintuv oʼtkazish qarori Oʼzbekiston Respublikasi Jinoyat-protsessual kodeksining talablari asosida ikki nafar xolislar ishtirokida U.Nabiev va boshqa ishtirokchilarga oʼqib eshittirilgan hamda oʼtkazilgan tintuv jarayonida U.Nabievning yashash xonadonidan jinoyat ishiga aloqadorligini tekshirib koʼrish maqsadida, bir nechta fleshkalar, 1 dona kompyuter protsessori, 1 dona «Samsung» rusumli planshet, muayyan miqdordagi pul mablagʼlari, bir qator xoʼjalik yurituvchi subʼektlarning muhrlari va turli xil hujjatlar alohida paketlarga solinib, rasmiylashtirib olingan.

Bundan tashqari, U.Nabievning qarindoshi M.Isomovni Karmana tumani I.Karimov koʼchasi 3a-uyda joylashgan xonadonida ham protsessual tartibda tintuv oʼtkazilgan va jinoyat ishiga aloqador hech narsa olinmagan, ushbu tergov harakati boshlanishidan avval M.Isomov eʼtirozi yoʼqligini bildirgan va ushbu haqda bayonnoma tuzilgan.

Tintuv tergov harakatlari vaqtida U.Nabiev va M.Isomovlarga nisbatan biron-bir noqonuniy xatti-harakatlar sodir etilmagan.

Barcha tintuv tergov harakatlari viloyat IIB EKB xodimlari tomonidan videokamera orqali uzluksiz videotasvirga olingan. Tintuv tergov harakati yakunida toʼldirilgan bayonnoma tergovchilar tomonidan ishtirokchilarga oʼqib eshittirilgan va tomonlar bayonnoma bilan tanishib, qoʼshimcha va eʼtirozlari yoʼqligini tasdiqlab imzo qoʼyishgan.

Tintuv tergov harakati kechiktirib boʼlmas holatda oʼtkazilganligi bois, keyinchalik yaʼni 24 soat ichida, protsessual muddat buzilmagan holda tegishli prokurorga axborot berilgan.

U.Nabiev va M.Isomovning viloyat prokuraturasiga yoʼllagan arizalari boʼyicha, prokuraturaning xizmat tekshiruv tayinlash haqidagi xatiga asosan Oʼzbekiston Respublikasi IIV Oʼz xavfsizlik boshqarmasi tomonidan holat yuzasidan xizmat tekshiruvi oʼtkazilmoqda.

Hozirda mazkur jinoyat ishi yuzasidan Oʼzbekiston Respublikasi IIV huzuridagi Tergov departamenti tomonidan dastlabki tergov harakatlari olib borilmoqda.

Fuqarolarimizdan mazkur jinoyat ishi boʼyicha dastlabki tergovning yakuniga koʼra rasmiy maʼlumot taqdim qilingunga qadar ijtimoiy tarmoqlarda nomaqbul izohlar berishdan saqlanishlarini soʼraymiz.

 

-------------------------------------------------------------------------------------------------------------------

кирилча

Фуқаролар У.Набиев ва М.Исомовларнинг хонадонларида Навоий вилоят ИИБ ходимлари томонидан ўтказилган тинтув тергов ҳаракатларидан норозиликлари ҳақида йўллаган мурожаатлари Тергов департаменти томонидан ўрганиб чиқилди.

Аниқланишича: Ўзбекистон Республикаси ИИВ ҳузуридаги Тергов департаменти томонидан “Авто 60 ой” МЧЖ мансабдор шахсларига нисбатан ЖКнинг 1881-моддаси 1-қисми билан тергов ҳаракатлари олиб борилаётган жиноят иши бўйича 14.10.2019 йилда ЖПКнинг 347-моддаси тартибида берилган алоҳида топшириқда “жабрланувчиларга етказилган моддий зарарни ўрнини қоплаш мақсадида жамиятнинг вилоятлардаги филиалларида фаолият юритиб келган шахслар томонидан жиноий фаолиятдан олинган даромадларни легаллаштириш ҳолатлари ва легаллаштирилган мол-мулкларни аниқлаш борасида тергов-тезкор ҳаракатларини ташкиллаштириш, аниқланган мол-мулкларни хатлаш чораларини кўриш” ҳамда филиал бошлиқлари (менеджер, норасмий раҳбар) ва касса мудирларининг уйларида тинтув тергов ҳаракатини ўтказиш кўрсатиб ўтилган.

“Авто 60 ой” МЧЖнинг филиаллари барча вилоятларда мавжуд бўлиб, филиаллар ўзаро маълумот алмашиб, ишга оид ҳужжатларни йўқ қилиши мумкинлигини олдини олиш мақсадида, республика бўйича жами 50 дан ортиқ манзилларда хусусан Навоий вилоятида ҳам кўплаб манзилларда бир вақтнинг ўзида кечиктириб бўлмайдиган ҳолатда тинтув тергов ҳаракати ўтказилган.

Бунинг асосий сабаби жамиятнинг барча филиаллари бир-бири билан ўзаро узвий алоқада бўлиб турган, агар тинтув ҳаракатлари бирин-кетин ўтказиладиган бўлса, бундан бошқа филиаллар хабар топиб иш учун аҳамиятли ашёвий далилларни йўқ қилиши мумкин бўлган.

Буни олдини олиш мақсадида Навоий вилоят ИИБ ҳузуридаги Тергов бошқармаси бошлиғи томонидан катта терговчи Р.Бозоров раҳбарлигида тергов гуруҳи тузилиб, гуруҳ раҳбарининг 14.10.2019 йилги кечиктириб бўлмайдиган тинтув ўтказиш ҳақидаги қарорига мувофиқ Навоий вилояти Кармана тумани И.Каримов кўчаси 3а-уйда жойлашган жамият офиси ва 2 та хонадонда тинтув ўтказилган.

Тинтув ўтказиш қарори Ўзбекистон Республикаси Жиноят-процессуал кодексининг талаблари асосида икки нафар холислар иштирокида У.Набиев ва бошқа иштирокчиларга ўқиб эшиттирилган ҳамда ўтказилган тинтув жараёнида У.Набиевнинг яшаш хонадонидан жиноят ишига алоқадорлигини текшириб кўриш мақсадида, бир нечта флешкалар, 1 дона компьютер процессори, 1 дона «Samsung» русумли планшет, муайян миқдордаги пул маблағлари, бир қатор хўжалик юритувчи субъектларнинг муҳрлари ва турли хил ҳужжатлар алоҳида пакетларга солиниб, расмийлаштириб олинган.

Бундан ташқари, У.Набиевнинг қариндоши М.Исомовни Кармана тумани И.Каримов кўчаси 3а-уйда жойлашган хонадонида ҳам процессуал тартибда тинтув ўтказилган ва жиноят ишига алоқадор ҳеч нарса олинмаган, ушбу тергов ҳаракати бошланишидан аввал М.Исомов эътирози йўқлигини билдирган ва ушбу ҳақда баённома тузилган.

Тинтув тергов ҳаракатлари вақтида У.Набиев ва М.Исомовларга нисбатан бирон-бир ноқонуний хатти-ҳаракатлар содир этилмаган.

Барча тинтув тергов ҳаракатлари вилоят ИИБ ЭКБ ходимлари томонидан видеокамера орқали узлуксиз видеотасвирга олинган. Тинтув тергов ҳаракати якунида тўлдирилган баённома терговчилар томонидан иштирокчиларга ўқиб эшиттирилган ва томонлар баённома билан танишиб, қўшимча ва эътирозлари йўқлигини тасдиқлаб имзо қўйишган.

Тинтув тергов ҳаракати кечиктириб бўлмас ҳолатда ўтказилганлиги боис, кейинчалик яъни 24 соат ичида, процессуал муддат бузилмаган ҳолда тегишли прокурорга ахборот берилган.
У.Набиев ва М.Исомовнинг вилоят прокуратурасига йўллаган аризалари бўйича, прокуратуранинг хизмат текширув тайинлаш ҳақидаги хатига асосан Ўзбекистон Республикаси ИИВ Ўз хавфсизлик бошқармаси томонидан ҳолат юзасидан хизмат текшируви ўтказилмоқда.

Ҳозирда мазкур жиноят иши юзасидан Ўзбекистон Республикаси ИИВ ҳузуридаги Тергов департаменти томонидан дастлабки тергов ҳаракатлари олиб борилмоқда.

Фуқароларимиздан мазкур жиноят иши бўйича дастлабки терговнинг якунига кўра расмий маълумот тақдим қилингунга қадар ижтимоий тармоқларда номақбул изоҳлар беришдан сақланишларини сўраймиз.

Ўзбекистон Республикаси ИИВ ҳузуридаги Тергов департаменти

Powered by GSpeech