Konstitutsiya va qonun ustuvorligiga erishishda jamoatchilik nazoratidan koʼra samarali vosita yoʼq
“Oʼzbekiston” xalqaro anjumanlar saroyida 7 dekabr kuni Oʼzbekiston Respublikasi Konstitutsiyasi qabul qilinganining 27 yilligiga bagʼishlangan tantanali yigʼilish boʼlib oʼtdi. Bu haqda O'zbekiston Respublikasi Prezidentining rasmiy saytida ma'lum qilingan.
Oʼzbekiston Respublikasi Prezidenti Shavkat Mirziyoyev xalqimizni ushbu qutlugʼ ayyom bilan tabrikladi. 
Har bir davlat oʼz taraqqiyot yoʼlini tanlar ekan, eng muhim maqsad va vazifalarini belgilab oladi. Mamlakatimiz mustaqilligining ilk davrida qabul qilingan Konstitutsiyada ham xalqimizning xohish-irodasi, inson huquq va manfaatlari, davlat tuzilishi oʼz ifodasini topgan. Bosh qomusimiz, jinsi, irqi, millati, dini, ijtimoiy kelib chiqishidan qatʼi nazar, yurtimiz fuqarolari tengligining kafolatlanishini qayd etdi va zamonaviy demokratik taraqqiyot uchun zamin yaratdi.
Shu bois Konstitutsiyamizni ardoqlaymiz, ulugʼlaymiz, oʼrganamiz.
Prezident Shavkat Mirziyoyev bugun oʼz nutqida qonun ustuvorligini taʼminlash demokratik huquqiy davlatning bosh mezoni hisoblanishi, davlat hokimiyati va boshqaruvi organlari ishlab chiqayotgan hujjatlar, mansabdor shaxslarning xatti-harakatlari faqat va faqat Konstitutsiya hamda qonunlarga muvofiq boʼlishi shartligini alohida aytib oʼtdi.
Davlatimiz rahbari taʼkidlaganidek, Konstitutsiya va qonun ustuvorligiga erishishda jamoatchilik nazoratidan koʼra samarali vosita yoʼq.
Qonuniylikni qaror toptirish, qonun buzilishiga qarshi kurashish borasida jamoatchilik va ommaviy axborot vositalari “uygʼongani” qayd etildi. Masalan, Davlat byudjeti muhokamasi paytida fuqarolar va deputatlar fikri asosida maktablar uchun 50 milliard soʼm qoʼshimcha mablagʼ ajratilgani yoki odamlarning haqli eʼtirozi tufayli daraxtlarni sababsiz kesishga qarshi moratoriy eʼlon qilingani ijobiy baholandi. Bular aholining ijtimoiy jarayonlarga nisbatan masʼuliyat va daxldorlik hissi oshib borayotganini koʼrsatadi.
Davlatimiz rahbari jamiyatda huquqiy ong va madaniyatni yuksaltirish borasidagi ishlarni uzluksiz davom ettirish, bu boradagi koʼnikmalarni farzandlar tarbiyasiga bolalikdan singdirish kerakligini taʼkidladi. 
– Konstitutsiyamiz har bir fuqaroning ongi va qalbidan chuqur joy olgan, ularning huquq va erkinliklarini toʼliq kafolatlaydigan haqiqiy hayot qomusiga aylanmogʼi lozim, – dedi Shavkat Mirziyoev.
Bosh qomusimizda belgilangan insonparvar tamoyillar toʼla amalga oshirilmoqda. Soʼnggi yillarda Prezidentimizning jinoyat sodir etganlarni afv etish boʼyicha 8 ta farmoni qabul qilinib, 4 mingdan ziyod shaxs jazoni oʼtash joylaridan ozod qilindi.
Ushbu bayram arafasida Oʼzbekiston rahbari yana bir shunday farmonga imzo chekdi. Unga binoan, jinoiy qilmishiga chin dildan pushaymon boʼlib, tuzalish yoʼliga qatʼiy oʼtgan 92 nafar mahkum afv etildi.
Bu yil Jasliq qoʼrgʼonidagi jazoni ijro etish koloniyasi yopilgani ham insonparvar siyosatning amaliy namunasi boʼldi. Bundan tashqari, ozodlikdan mahrum etilgan shaxslarga pensiya va ijtimoiy sugʼurta toʼlash tartibi birinchi marta yoʼlga qoʼyildi.
Joriy yilda “Mehr-1” va “Mehr-2” insonparvarlik amaliyotlari doirasida qurolli mojarolar maydonidan 261 nafar fuqaro, asosan ayollar va bolalar yurtimizga qaytarib kelindi.
Oʼtgan uch yilda 9 ming 692 nafar, jumladan, bu yilda 5 ming 868 nafar shaxs Oʼzbekiston fuqaroligiga qabul qilindi.
Davlatimiz rahbari huquqni muhofaza qiluvchi organlarni faqat va faqat xalq manfaati yoʼlida ogʼishmay xizmat qiladigan idoralarga aylantirish zarurligini taʼkidladi.
Sudlarning mustaqilligini mustahkamlash, tergov-surishtiruv jarayonida oʼzaro tiyib turish tamoyillarini taʼminlash, advokatura institutini takomillashtirishga oid dolzarb vazifalarni koʼrsatib oʼtdi.
Oʼzbekiston Respublikasi Davlat madhiyasi yangradi. Bayram tantanasiga yigʼilganlar qoʼllarini koʼksiga qoʼyib, Mustaqilligimiz qoʼshigʼiga joʼr boʼldi.
Bayram tadbirida davlat va jamoat arboblari, ilm-fan va sanʼat namoyandalari, xorijiy davlatlar elchixonalari va xalqaro tashkilotlar vakolatxonalari hamda keng jamoatchilik vakillari ishtirok etdi.
Tantana katta kontsert dasturi bilan davom etdi.
-----------------------------------------------------------------------------------------------
Конституция ва қонун устуворлигига эришишда жамоатчилик назоратидан кўра самарали восита йўқ
“Ўзбекистон” халқаро анжуманлар саройида 7 декабрь куни Ўзбекистон Республикаси Конституцияси қабул қилинганининг 27 йиллигига бағишланган тантанали йиғилиш бўлиб ўтди.
Ўзбекистон Республикаси Президенти Шавкат Мирзиёев халқимизни ушбу қутлуғ айём билан табриклади.
Ҳар бир давлат ўз тараққиёт йўлини танлар экан, энг муҳим мақсад ва вазифаларини белгилаб олади. Мамлакатимиз мустақиллигининг илк даврида қабул қилинган Конституцияда ҳам халқимизнинг хоҳиш-иродаси, инсон ҳуқуқ ва манфаатлари, давлат тузилиши ўз ифодасини топган. Бош қомусимиз, жинси, ирқи, миллати, дини, ижтимоий келиб чиқишидан қатъи назар, юртимиз фуқаролари тенглигининг кафолатланишини қайд этди ва замонавий демократик тараққиёт учун замин яратди.
Шу боис Конституциямизни ардоқлаймиз, улуғлаймиз, ўрганамиз.
Президент Шавкат Мирзиёев бугун ўз нутқида қонун устуворлигини таъминлаш демократик ҳуқуқий давлатнинг бош мезони ҳисобланиши, давлат ҳокимияти ва бошқаруви органлари ишлаб чиқаётган ҳужжатлар, мансабдор шахсларнинг хатти-ҳаракатлари фақат ва фақат Конституция ҳамда қонунларга мувофиқ бўлиши шартлигини алоҳида айтиб ўтди.
Давлатимиз раҳбари таъкидлаганидек, Конституция ва қонун устуворлигига эришишда жамоатчилик назоратидан кўра самарали восита йўқ.
Қонунийликни қарор топтириш, қонун бузилишига қарши курашиш борасида жамоатчилик ва оммавий ахборот воситалари “уйғонгани” қайд этилди. Масалан, Давлат бюджети муҳокамаси пайтида фуқаролар ва депутатлар фикри асосида мактаблар учун 50 миллиард сўм қўшимча маблағ ажратилгани ёки одамларнинг ҳақли эътирози туфайли дарахтларни сабабсиз кесишга қарши мораторий эълон қилингани ижобий баҳоланди. Булар аҳолининг ижтимоий жараёнларга нисбатан масъулият ва дахлдорлик ҳисси ошиб бораётганини кўрсатади.
Давлатимиз раҳбари жамиятда ҳуқуқий онг ва маданиятни юксалтириш борасидаги ишларни узлуксиз давом эттириш, бу борадаги кўникмаларни фарзандлар тарбиясига болаликдан сингдириш кераклигини таъкидлади.
– Конституциямиз ҳар бир фуқаронинг онги ва қалбидан чуқур жой олган, уларнинг ҳуқуқ ва эркинликларини тўлиқ кафолатлайдиган ҳақиқий ҳаёт қомусига айланмоғи лозим, – деди Шавкат Мирзиёев.
Бош қомусимизда белгиланган инсонпарвар тамойиллар тўла амалга оширилмоқда. Сўнгги йилларда Президентимизнинг жиноят содир этганларни афв этиш бўйича 8 та фармони қабул қилиниб, 4 мингдан зиёд шахс жазони ўташ жойларидан озод қилинди.
Ушбу байрам арафасида Ўзбекистон раҳбари яна бир шундай фармонга имзо чекди. Унга биноан, жиноий қилмишига чин дилдан пушаймон бўлиб, тузалиш йўлига қатъий ўтган 92 нафар маҳкум афв этилди.
Бу йил Жаслиқ қўрғонидаги жазони ижро этиш колонияси ёпилгани ҳам инсонпарвар сиёсатнинг амалий намунаси бўлди. Бундан ташқари, озодликдан маҳрум этилган шахсларга пенсия ва ижтимоий суғурта тўлаш тартиби биринчи марта йўлга қўйилди.
Жорий йилда “Меҳр-1” ва “Меҳр-2” инсонпарварлик амалиётлари доирасида қуролли можаролар майдонидан 261 нафар фуқаро, асосан аёллар ва болалар юртимизга қайтариб келинди.
Ўтган уч йилда 9 минг 692 нафар, жумладан, бу йилда 5 минг 868 нафар шахс Ўзбекистон фуқаролигига қабул қилинди.
Давлатимиз раҳбари ҳуқуқни муҳофаза қилувчи органларни фақат ва фақат халқ манфаати йўлида оғишмай хизмат қиладиган идораларга айлантириш зарурлигини таъкидлади.
Судларнинг мустақиллигини мустаҳкамлаш, тергов-суриштирув жараёнида ўзаро тийиб туриш тамойилларини таъминлаш, адвокатура институтини такомиллаштиришга оид долзарб вазифаларни кўрсатиб ўтди.
Ўзбекистон Республикаси Давлат мадҳияси янгради. Байрам тантанасига йиғилганлар қўлларини кўксига қўйиб, Мустақиллигимиз қўшиғига жўр бўлди.
Байрам тадбирида давлат ва жамоат арбоблари, илм-фан ва санъат намояндалари, хорижий давлатлар элчихоналари ва халқаро ташкилотлар ваколатхоналари ҳамда кенг жамоатчилик вакиллари иштирок этди.
Тантана катта концерт дастури билан давом этди.
