Senatorlar “Oʼzbekiston Respublikasi Soliq kodeksining qabul qilinishi munosabati bilan Oʼzbekiston Respublikasining ayrim qonun hujjatlariga oʼzgartish va qoʼshimchalar kiritish, shuningdek ayrim qonun xujjatlarini oʼz kuchini yoʼqotgan deb topish toʼgʼrisida”gi Oʼzbekiston Respublikasining Qonunini koʼrib chiqdilar. Bu haqda Oliy Majlis Senatining rasmiy saytida ma'lum qilingan. 

Qayd etilganidek, Qonun Oʼzbekiston Respublikasining 13 ta qonuniga oʼzgartish va qoʼshimchalar kiritishni, shuningdek 7 ta qonunni oʼz kuchini yoʼqotgan deb topishni nazarda tutuvchi 17 ta moddadan iborat. Masalan, “Er osti boyliklari toʼgʼrisida”gi Qonunga yer qaʼridan foydalanuvchining tegishli litsenziya asosida foydali qazilmalarni aniqlash va razvedka qilish boʼyicha faoliyatni amalga oshirish huquqi uchun litsenziya olgan yer qaʼridan foydalanuvchilar tomonidan imzoli bonus va tijoratbop topilma bonusini toʼlashni, ularni toʼlash muddatlarini nazarda tutuvchi oʼzgartish va qoʼshimchalar kiritilmoqda. Bundan tashqari, foydali qazilmalar zaxiralarining qazib olinadigan hajmining qiymatini aniqlash va tijoratbop topilma bonusini toʼlash tartibi oʼrnatilmoqda. Tijoratbop topilma bonusining hisob-kitobini davlat soliq xizmati organlariga taqdim etish va uni toʼlash muddati belgilanmoqda.

“Fermer xoʼjaligi toʼgʼrisida”gi, “Oilaviy tadbirkorlik toʼgʼrisida”gi qonunlarga soliq va yigʼimlar toʼlash hamda ular toʼlangach, foyda kelishi tartibini belgilashni nazarda tutuvchi oʼzgartishlar kiritilmoqda.

Senatorlar Qonun qabul qilinishi soliqlar va yigʼimlar ajratish tartib-taomillarining shaffofligini kuchaytirish va oshirishga, shuningdek vijdonli soliq toʼlovchilar huquqlari hamda qonuniy manfaatlari himoyasini kuchaytirishga koʼmaklashishini taʼkidladilar. Qonun senatorlar tomonidan maʼqullandi.

-----------------------------

Солиқ кодекснинг қабул қилиниши муносабати билан Ўзбекистон Республикасининг айрим қонун ҳужжатларига ўзгартиш ва қўшимчалар киритилди

Сенаторлар “Ўзбекистон Республикаси Солиқ кодексининг қабул қилиниши муносабати билан Ўзбекистон Республикасининг айрим қонун ҳужжатларига ўзгартиш ва қўшимчалар киритиш, шунингдек айрим қонун хужжатларини ўз кучини йўқотган деб топиш тўғрисида”ги Ўзбекистон Республикасининг Қонунини кўриб чиқдилар.

Қайд этилганидек, Қонун Ўзбекистон Республикасининг 13 та қонунига ўзгартиш ва қўшимчалар киритишни, шунингдек 7 та қонунни ўз кучини йўқотган деб топишни назарда тутувчи 17 та моддадан иборат. Масалан, “Ер ости бойликлари тўғрисида”ги Қонунга ер қаъридан фойдаланувчининг тегишли лицензия асосида фойдали қазилмаларни аниқлаш ва разведка қилиш бўйича фаолиятни амалга ошириш ҳуқуқи учун лицензия олган ер қаъридан фойдаланувчилар томонидан имзоли бонус ва тижоратбоп топилма бонусини тўлашни, уларни тўлаш муддатларини назарда тутувчи ўзгартиш ва қўшимчалар киритилмоқда. Бундан ташқари, фойдали қазилмалар захираларининг қазиб олинадиган ҳажмининг қийматини аниқлаш ва тижоратбоп топилма бонусини тўлаш тартиби ўрнатилмоқда. Тижоратбоп топилма бонусининг ҳисоб-китобини давлат солиқ хизмати органларига тақдим этиш ва уни тўлаш муддати белгиланмоқда.

“Фермер хўжалиги тўғрисида”ги, “Оилавий тадбиркорлик тўғрисида”ги қонунларга солиқ ва йиғимлар тўлаш ҳамда улар тўлангач, фойда келиши тартибини белгилашни назарда тутувчи ўзгартишлар киритилмоқда.

Сенаторлар Қонун қабул қилиниши солиқлар ва йиғимлар ажратиш тартиб-таомилларининг шаффофлигини кучайтириш ва оширишга, шунингдек виждонли солиқ тўловчилар ҳуқуқлари ҳамда қонуний манфаатлари ҳимоясини кучайтиришга кўмаклашишини таъкидладилар. Қонун сенаторлар томонидан маъқулланди.