Oʼzbekiston Respublikasi Prezidenti Shavkat Mirziyoevning Markaziy Osiyo davlatlari rahbarlarining Maslahat uchrashuvi yakunlari boʼyicha brifingdagi bayonoti
Hurmatli ommaviy axborot vositalari vakillari! Bu haqda O'zbekiston Respublikasi Prezidentining rasmiy saytida ma'lum qilingan.
Xonimlar va janoblar!
Аvvalambor, sizlarni, bugun Toshkent shahrida oʼtkazilayotgan tarixiy anjumanni – Markaziy Osiyo davlatlari rahbarlarining Maslahat uchrashuvini yoritish maqsadida toʼplangan ommaviy axborot vositalari vakillarini samimiy qutlashdan mamnunman.
Ushbu formatdagi doimiy muloqotlarni oʼtkazish tashabbusi hurmatli hamkasblarim – mintaqa yetakchilarining faol qoʼllab-quvvatlashi bilan amalga oshmoqda.
Shu munosabat bilan 1998 yili Аshxabod shahrida boʼlib oʼtgan Markaziy Osiyo davlatlari rahbarlari sammitining tarixiy ahamiyatini hamda 2018 yilda Nur-Sulton shahridagi Maslahat uchrashuvining samarali natijalarini alohida taʼkidlab oʼtmoqchiman.
Bugungi samimiy muzokaralarimiz ham anʼanaviy doʼstlik va oʼzaro anglashuv ruhida oʼtdi.
Uchrashuvlar Markaziy Osiyo davlatlari rahbarlarining mintaqada ishonch va yaxshi qoʼshnichilik muhitini yanada mustahkamlashga boʼlgan intilishi va qatʼiy siyosiy irodasining yaqqol ifodasi boʼldi.
Biz oʼzaro hamkorlikning dolzarb masalalarini atroflicha muhokama qildik. Mamlakatlarimiz oʼrtasidagi aloqalarni har tomonlama kengaytirish yoʼlida butunlay hamfikr ekanimizni yana bir bor tasdiqladik.
Uchrashuv dolzarb mintaqaviy va xalqaro masalalar boʼyicha bizning qarash va yondashuvlarimiz oʼzaro juda yaqin ekanini namoyish etdi.
Mintaqaning mavjud ulkan iqtisodiy salohiyatidan foydalangan holda, ustuvor sohalarda muloqot va sheriklikni rivojlantirishga kelishib oldik.
Biz davlatlarimiz oʼrtasidagi savdo toʼsiqlarini bartaraf etish, sanoat kooperatsiyasini yanada kuchaytirish uchun barcha saʼy-harakatlarni amalga oshiramiz.
Energetika infratuzilmalarini modernizatsiya qilish va mintaqaning tranzit imkoniyatlarini kengaytirishga qaratilgan yirik loyihalarni roʼyobga chiqarish niyatidamiz.
Iqtisodiy va transport koridorlarining samarali mintaqaviy tizimini yaratish borasida faol hamkorligimiz bundan keyin ham davom etadi.
Suv resurslaridan birgalikda foydalanish, iqlim oʼzgarishlarining salbiy oqibatlarini yumshatish, ekologik xatarlarga qarshi kurashish masalalari boʼyicha ham batafsil fikr almashdik.
Biz innovatsion texnologiyalarni jalb qilish, “yashil iqtisodiyot” printsiplarini joriy etish, choʼllanishning oldini olish orqali Orolboʼyi muammolarini yechishdagi saʼy-harakatlarimizni muvofiqlashtirib boramiz.
Mamlakatlarimiz mintaqalari oʼrtasida faol muloqotni qoʼllab-quvvatlash, shuningdek, ilm-fan, taʼlim, turizm, madaniyat va sport sohalarida qoʼshma tadbirlarni muntazam oʼtkazib borishga kelishib oldik.
Biz Markaziy Osiyo xalqlarini birlashtirib turadigan umumiy qadriyat va anʼanalarni asrab-avaylash, keng targʼib qilish boʼyicha qoʼshma dasturlarni amalga oshirishdan manfaatdor ekanimizni bayon etdik.
Muzokaralar chogʼida mintaqada xavfsizlik va barqarorlikni taʼminlash uchun koʼp tomonlama hamkorlik masalalariga ayniqsa jiddiy eʼtibor qaratildi. Jumladan, huquqni muhofaza qilish organlari va maxsus xizmatlar oʼrtasida oʼzaro hamkorlik masalalari muhokama qilindi.
Biz Аfgʼoniston mojarosini tinch yoʼl bilan hal etish boʼyicha xalqaro saʼy-harakatlarni faollashtirish tarafdorimiz. Birodar afgʼon xalqiga amaliy yordam koʼrsatishni, yon qoʼshnimiz boʼlgan ushbu mamlakatda bevosita ular ishtirokida qoʼshma infratuzilma loyihalarini va mintaqaviy tashabbuslarni ilgari surishni bundan keyin ham jadal davom ettiramiz.
Bu chora-tadbirlar Аfgʼonistondagi vaziyatni barqarorlashtirish, tinchlik jarayonlarini taʼminlash, iqtisodiyotni qayta tiklash uchun zarur shart-sharoitlar yaratishiga ishonamiz.
Mintaqamiz davlatlari rahbarlarining Maslahat uchrashuvi format́idagi har yil oʼtkaziladigan sammitlar gʼoyatda muhim ekanini barchamiz qatʼiy maʼqulladik.
Uchrashuvlarimiz hamkorligimizning eng dolzarb masalalarini ochiqlik va oʼzaro ishonch asosida muhokama qilish uchun samarali muloqot maydoni boʼlishini yana bir bor tasdiqladi.
Sammit yakunida munosabatlarimiz natijadorligiga xizmat qiladigan muhim hujjatlar qabul qilindi.
Bu oʼrinda, avvalo, Qoʼshma bayonot haqida toʼxtalishni istar edim. Mazkur hujjat bizning mintaqaviy hamkorligimizni har tomonlama chuqurlashtirish, doʼstlik, yaxshi qoʼshnichilik va strategik sheriklik munosabatlarini mustahkamlash borasidagi umumiy siyosiy irodamizni yana bir bor tasdiqladi.
Biz Maslahat uchrashuvlariga tayyorgarlik koʼrish va ularni oʼtkazish Reglamentini maʼqulladik. Ushbu hujjat sammitlarga puxta hozirlik koʼrish, ularni tizimli ravishda oʼtkazish, kelishilgan va oʼzaro manfaatli qarorlar qabul qilishga asos boʼlib xizmat qiladi.
Biz Turkmaniston Prezidentining taklifini toʼla qoʼllab-quvvatladik va oqsoqolimiz, Qozogʼiston Respublikasining Birinchi Prezidenti – Elboshi Nursulton Аbishevich Nazarboevni Markaziy Osiyo davlatlari rahbarlarining Maslahat uchrashuvining faxriy raisi etib sayladik.
Eʼtiboringizni muhim bir masalaga qaratmoqchiman. Markaziy Osiyo davlatlari rahbarlarining Maslahat uchrashuvi formati qandaydir yangi mintaqaviy tashkilot tuzish haqida gapirishga asos boʼla olmaydi.
Hurmatli jurnalistlar!
Xonimlar va janoblar!
Markaziy Osiyo – asrlar davomida qondosh xalqlar tinch va totuv yashab kelayotgan jahondagi kam sonli mintaqalardan biridir.
Bizni mushtarak tarix va madaniyat, yagona muqaddas din, oʼxshash mentalitet, maʼnaviy-axloqiy qadriyat va anʼanalar hamda ajralmas doʼstlik chambarchas bogʼlab turadi.
Bularning barchasi xalqlarimiz farovonligi va ravnaqi yoʼlida Markaziy Osiyo davlatlari salohiyatini birlashtirishga qaratilgan oʼzaro manfaatli hamkorligimiz uchun mustahkam poydevor boʼlib xizmat qiladi.
Soʼzimning yakunida shuni aytishni istardimki, biz oliy darajadagi mintaqaviy muloqotni rivojlantirishning sifat jihatidan mutlaqo yangi bosqichiga koʼtarildik.
Hech shubhasiz, birgalikdagi intilishlarimiz bilan oldimizda turgan barcha maqsadlarga albatta erishamiz. Markaziy Osiyoni xavfsiz va barqaror taraqqiyot mintaqasiga, koʼpqirrali sheriklik makoniga aylantiramiz.
Biz navbatdagi Maslahat uchrashuvimizni kelgusi yili Qirgʼizistonning goʼzal Bishkek shahrida oʼtkazishga kelishib oldik.
Eʼtiborlaringiz uchun rahmat.
-----------------------------------------------------------------------------------
Ҳурматли оммавий ахборот воситалари вакиллари!
Хонимлар ва жаноблар!
Авваламбор, сизларни, бугун Тошкент шаҳрида ўтказилаётган тарихий анжуманни – Марказий Осиё давлатлари раҳбарларининг Маслаҳат учрашувини ёритиш мақсадида тўпланган оммавий ахборот воситалари вакилларини самимий қутлашдан мамнунман.
Ушбу форматдаги доимий мулоқотларни ўтказиш ташаббуси ҳурматли ҳамкасбларим – минтақа етакчиларининг фаол қўллаб-қувватлаши билан амалга ошмоқда.
Шу муносабат билан 1998 йили Ашхабод шаҳрида бўлиб ўтган Марказий Осиё давлатлари раҳбарлари саммитининг тарихий аҳамиятини ҳамда 2018 йилда Нур-Султон шаҳридаги Маслаҳат учрашувининг самарали натижаларини алоҳида таъкидлаб ўтмоқчиман.
Бугунги самимий музокараларимиз ҳам анъанавий дўстлик ва ўзаро англашув руҳида ўтди.
Учрашувлар Марказий Осиё давлатлари раҳбарларининг минтақада ишонч ва яхши қўшничилик муҳитини янада мустаҳкамлашга бўлган интилиши ва қатъий сиёсий иродасининг яққол ифодаси бўлди.
Биз ўзаро ҳамкорликнинг долзарб масалаларини атрофлича муҳокама қилдик. Мамлакатларимиз ўртасидаги алоқаларни ҳар томонлама кенгайтириш йўлида бутунлай ҳамфикр эканимизни яна бир бор тасдиқладик.
Учрашув долзарб минтақавий ва халқаро масалалар бўйича бизнинг қараш ва ёндашувларимиз ўзаро жуда яқин эканини намойиш этди.
Минтақанинг мавжуд улкан иқтисодий салоҳиятидан фойдаланган ҳолда, устувор соҳаларда мулоқот ва шерикликни ривожлантиришга келишиб олдик.
Биз давлатларимиз ўртасидаги савдо тўсиқларини бартараф этиш, саноат кооперациясини янада кучайтириш учун барча саъй-ҳаракатларни амалга оширамиз.
Энергетика инфратузилмаларини модернизация қилиш ва минтақанинг транзит имкониятларини кенгайтиришга қаратилган йирик лойиҳаларни рўёбга чиқариш ниятидамиз.
Иқтисодий ва транспорт коридорларининг самарали минтақавий тизимини яратиш борасида фаол ҳамкорлигимиз бундан кейин ҳам давом этади.
Сув ресурсларидан биргаликда фойдаланиш, иқлим ўзгаришларининг салбий оқибатларини юмшатиш, экологик хатарларга қарши курашиш масалалари бўйича ҳам батафсил фикр алмашдик.
Биз инновацион технологияларни жалб қилиш, “яшил иқтисодиёт” принципларини жорий этиш, чўлланишнинг олдини олиш орқали Оролбўйи муаммоларини ечишдаги саъй-ҳаракатларимизни мувофиқлаштириб борамиз.
Мамлакатларимиз минтақалари ўртасида фаол мулоқотни қўллаб-қувватлаш, шунингдек, илм-фан, таълим, туризм, маданият ва спорт соҳаларида қўшма тадбирларни мунтазам ўтказиб боришга келишиб олдик.
Биз Марказий Осиё халқларини бирлаштириб турадиган умумий қадрият ва анъаналарни асраб-авайлаш, кенг тарғиб қилиш бўйича қўшма дастурларни амалга оширишдан манфаатдор эканимизни баён этдик.
Музокаралар чоғида минтақада хавфсизлик ва барқарорликни таъминлаш учун кўп томонлама ҳамкорлик масалаларига айниқса жиддий эътибор қаратилди. Жумладан, ҳуқуқни муҳофаза қилиш органлари ва махсус хизматлар ўртасида ўзаро ҳамкорлик масалалари муҳокама қилинди.
Биз Афғонистон можаросини тинч йўл билан ҳал этиш бўйича халқаро саъй-ҳаракатларни фаоллаштириш тарафдоримиз. Биродар афғон халқига амалий ёрдам кўрсатишни, ён қўшнимиз бўлган ушбу мамлакатда бевосита улар иштирокида қўшма инфратузилма лойиҳаларини ва минтақавий ташаббусларни илгари суришни бундан кейин ҳам жадал давом эттирамиз.
Бу чора-тадбирлар Афғонистондаги вазиятни барқарорлаштириш, тинчлик жараёнларини таъминлаш, иқтисодиётни қайта тиклаш учун зарур шарт-шароитлар яратишига ишонамиз.
Минтақамиз давлатлари раҳбарларининг Маслаҳат учрашуви формат́идаги ҳар йил ўтказиладиган саммитлар ғоятда муҳим эканини барчамиз қатъий маъқулладик.
Учрашувларимиз ҳамкорлигимизнинг энг долзарб масалаларини очиқлик ва ўзаро ишонч асосида муҳокама қилиш учун самарали мулоқот майдони бўлишини яна бир бор тасдиқлади.
Саммит якунида муносабатларимиз натижадорлигига хизмат қиладиган муҳим ҳужжатлар қабул қилинди.
Бу ўринда, аввало, Қўшма баёнот ҳақида тўхталишни истар эдим. Мазкур ҳужжат бизнинг минтақавий ҳамкорлигимизни ҳар томонлама чуқурлаштириш, дўстлик, яхши қўшничилик ва стратегик шериклик муносабатларини мустаҳкамлаш борасидаги умумий сиёсий иродамизни яна бир бор тасдиқлади.
Биз Маслаҳат учрашувларига тайёргарлик кўриш ва уларни ўтказиш Регламентини маъқулладик. Ушбу ҳужжат саммитларга пухта ҳозирлик кўриш, уларни тизимли равишда ўтказиш, келишилган ва ўзаро манфаатли қарорлар қабул қилишга асос бўлиб хизмат қилади.
Биз Туркманистон Президентининг таклифини тўла қўллаб-қувватладик ва оқсоқолимиз, Қозоғистон Республикасининг Биринчи Президенти – Элбоши Нурсултон Абишевич Назарбоевни Марказий Осиё давлатлари раҳбарларининг Маслаҳат учрашувининг фахрий раиси этиб сайладик.
Эътиборингизни муҳим бир масалага қаратмоқчиман. Марказий Осиё давлатлари раҳбарларининг Маслаҳат учрашуви формати қандайдир янги минтақавий ташкилот тузиш ҳақида гапиришга асос бўла олмайди.
Ҳурматли журналистлар!
Хонимлар ва жаноблар!
Марказий Осиё – асрлар давомида қондош халқлар тинч ва тотув яшаб келаётган жаҳондаги кам сонли минтақалардан биридир.
Бизни муштарак тарих ва маданият, ягона муқаддас дин, ўхшаш менталитет, маънавий-ахлоқий қадрият ва анъаналар ҳамда ажралмас дўстлик чамбарчас боғлаб туради.
Буларнинг барчаси халқларимиз фаровонлиги ва равнақи йўлида Марказий Осиё давлатлари салоҳиятини бирлаштиришга қаратилган ўзаро манфаатли ҳамкорлигимиз учун мустаҳкам пойдевор бўлиб хизмат қилади.
Сўзимнинг якунида шуни айтишни истардимки, биз олий даражадаги минтақавий мулоқотни ривожлантиришнинг сифат жиҳатидан мутлақо янги босқичига кўтарилдик.
Ҳеч шубҳасиз, биргаликдаги интилишларимиз билан олдимизда турган барча мақсадларга албатта эришамиз. Марказий Осиёни хавфсиз ва барқарор тараққиёт минтақасига, кўпқиррали шериклик маконига айлантирамиз.
Биз навбатдаги Маслаҳат учрашувимизни келгуси йили Қирғизистоннинг гўзал Бишкек шаҳрида ўтказишга келишиб олдик.
Эътиборларингиз учун раҳмат.
