O‘zbekiston Respublikasi IIV huzuridagi Tergov departamenti tomonidan “HUMAN xususiy bandlik Agentligi” MChJ mansabdor shaxslariga nisbatan O‘zbekiston Respublikasi Jinoyat kodeksining 168-moddasi 4-qismi «a» bandi (juda ko‘p miqdorda sodir etilgan firibgarlik) bilan qo‘zg‘atilgan jinoyat ishi bo‘yicha olib borilgan dastlabki tergov harakatlari yakunlandi.

Ma'lumki 20.09.2019 yilda jamiyat rahbari Sh.Fayzullayevga JKning 168-moddasi 4-qismi «a» bandi bilan ayblov e'lon qilinib, «qamoqqa olish» tarzidagi ehtiyot chorasi qo‘llanilgan.

Tergov jarayonida 1000 dan ortiq fuqaro jabrlanuvchi va fuqaroviy da'vogar deb e'tirof etildi hamda ularga jami jamiyat tomonidan 21 mlrd. so‘mdan ziyod zarar yetkazilganligi aniqlandi.

Dastlabki tergov davomida Sh.Z.Fayzullayevga tegishli bo‘lgan xonadonlar, avtomashinalar olingan bo‘lib, ular 6 mlrd. so‘mdan ortiqroq narxga baholangan, bundan tashqari jamiyat ofisida va boshqa joylarda bo‘lgan mol-mulklar ham xatlanib, 350 mln. so‘mdan ziyod narxga baholangan.

Shuningdek, zararni qoplash maqsadida Sh.Fayzullayev tomonidan turli xo‘jalik yurituvchi subyektlarning hisob raqamlariga o‘tkazilib, kelib chiqishiga qonuniy tus berilgan 1,5 mlrd so‘mga yaqin pul mablag‘lari xatlanib, IIV huzuridagi depozit hisob raqamiga topshirilgan. Ushbu mol-mulklar keyinchalik sudning qonuniy qarori bilan sotilib, depozitdagi pul mablag‘lariga qo‘shilib, jabrlanuvchilarga yetkazilgan zararni qoplash uchun qaytariladi.

Shuni ta'kidlash lozimki, Tergov idorasi fuqarolarimizga yetkazilgan zararni to‘liq qoplash choralarini ko‘rish maqsadida olib borilgan tergov-tezkor harakatlar natijasida «HUMAN xususiy bandlik Agentligi» MChJ mansabdor shaxslari tomonidan fuqarolardan olingan juda ko‘p miqdordagi jami 15 mlrd. so‘mga yaqin pul mablag‘lari 11 ta xo‘jalik yurituvchi subyektlarga “turli xil maqsadlarda” o‘tkazilib, ularni kelib chiqishiga qonuniy tus berilgani va qing‘ir niyatli “tadbirkorlar” yordamida naqdlashtirilib, o‘zlashtirilgani aniqlangan.

Hozirda ushbu soxta tadbirkorlarga nisbatan jinoyat ishi qo‘zg‘atilgan, o‘ylaymizki, ulardan ushbu pul mablag‘larini qaytarishga qaratilgan barcha kuch- vositalar ishga solinadi va fuqarolarimizga yetkazilgan moddiy zararni qoplash choralari ko‘riladi.

07.12.2019 yilda Sh.Z.Fayzullayevga nisbatan e'lon qilingan ayblov Jinoyat kodeksining firibgarlik, savdo qoidalarini buzish, rasmiy hujjatlarni qasddan nobud qilish, soxta tadbirkorlik, jinoiy faoliyatdan olingan daromadlarni legallashtirish va nodavlat tijorat tashkiloti mansabdor shaxsi tomonidan o‘z vakolatlarini suiiste'mol qilish jinoyatlari uchun javobgarlikni nazarda tutuvchi moddalari bilan to‘ldirilgan.

Hozirda jinoyat ishi yuzasidan ayblov xulosasi tuzilib, ayblov xulosasini tasdiqlash va tegishli sud idorasiga mazmunan ko‘rib chiqish uchun berish maqsadida prokuratura idorasiga yuborildi.

O'zbekiston Respublikasi IIV huzuridagi Tergov departamenti

Ўзбекистон Республикаси ИИВ ҳузуридаги Тергов департаменти томонидан “HUMAN хусусий бандлик Агентлиги” МЧЖ мансабдор шахсларига нисбатан Ўзбекистон Республикаси ЖКнинг 168-моддаси
4-қисми «а» банди (жуда кўп миқдорда содир этилган фирибгарлик) билан қўзғатилган жиноят иши бўйича олиб борилган дастлабки тергов ҳаракатлари якунланди.

Маълумки, 20.09.2019 йилда жамият раҳбари Ш.Файзуллаевга ЖКнинг 168-моддаси 4-қисми «а» банди билан айблов эълон қилиниб, «қамоққа олиш» тарзидаги эҳтиёт чораси қўлланилган.

Тергов жараёнида 1000 дан ортиқ фуқаро жабрланувчи ва фуқаровий даъвогар деб эътироф этилди ҳамда уларга жами жамият томонидан 21 млрд. сўмдан зиёд зарар етказилганлиги аниқланди.

Дастлабки тергов давомида Ш.З.Файзуллаевга тегишли бўлган хонадонлар, автомашиналар олинган бўлиб, улар 6 млрд. сўмдан ортиқроқ нархга баҳоланган, бундан ташқари жамият офисида ва бошқа жойларда бўлган мол-мулклар ҳам хатланиб, 350 млн. сўмдан зиёд нархга баҳоланган.

Шунингдек, зарарни қоплаш мақсадида Ш.Файзуллаев томонидан турли хўжалик юритувчи субъектларнинг ҳисоб рақамларига ўтказилиб, келиб чиқишига қонуний тус берилган 1,5 млрд сўмга яқин пул маблағлари  хатланиб, ИИВ ҳузуридаги депозит ҳисоб рақамига топширилган. Ушбу мол-мулклар кейинчалик суднинг қонуний қарори билан сотилиб, депозитдаги пул маблағларига қўшилиб, жабрланувчиларга етказилган  зарарни қоплаш учун қайтарилади.

Шуни таъкидлаш лозимки, Тергов идораси фуқароларимизга етказилган зарарни тўлиқ қоплаш чораларини кўриш мақсадида олиб борилган тергов-тезкор ҳаракатлар натижасида «HUMAN хусусий бандлик Агентлиги» МЧЖ мансабдор шахслари томонидан фуқаролардан олинган жуда кўп миқдордаги жами 15 млрд. сўмга яқин пул маблағлари 11 та хўжалик юритуви суъбектларга “турли хил мақсадларда” ўтказилиб, уларни келиб чиқишига қонуний тус берилгани ва қинғир ниятли “тадбиркорлар” ёрдамида нақдлаштирилиб, ўзлаштирилгани аниқланган.

Ҳозирда ушбу сохта тадбиркорларга нисбатан жиноят иши қўзғатилган, ўйлаймизки, улардан ушбу пул маблағларини қайтаришга қаратилган барча куч- воситалар ишга солинади ва фуқароларимизга етказилган моддий зарарни қоплаш чоралари кўрилади.

07.12.2019 йилда Ш.З.Файзуллаевга нисбатан эълон қилинган айблов жиноят кодексининг фирибгарлик, савдо қоидаларини бузиш, расмий ҳужжатларни қасддан нобуд қилиш, сохта тадбиркорлик, жиноий фаолиятдан олинган даромадларни легаллаштириш ва нодавлат тижорат ташкилоти мансабдор шахси томонидан ўз ваколатларини суиистеъмол қилиш жиноятлари учун жавобгарликни назарда тутувчи моддалари билан тўлдирилган.

Ҳозирда жиноят иши юзасидан айблов хулосаси тузилиб, айблов хулосасини тасдиқлаш ва тегишли суд идорасига мазмунан кўриб чиқиш учун бериш мақсадида прокуратура идорасига юборилди.

Ўзбекистон Республикаси ИИВ ҳузуридаги Тергов департаменти